الشاعر/صلاح الزبير احمد الزبير ودمسيخ

مجادعة ود مسيخ والهمباتي وبشري قريش
.من الهمباتي الأغبش في 8 يناير، 2012‏ في 02:33 مساءً‏‏.الهمباتي الأغبش

يا الليلة الخيال فارد عليا جناحو

بردب في حشاي طابل عقب مفتاحو

عن ساعة الغميد القاهو مالي براحو

وان وقل نظر بين العيون نتاحو





بشرى قريش

في داب النميم الليلة بانو و لاحو

أسياد النضم بارزين هناك في ساحو

شيطان الشعر باينلي فكو صراحو

فارقنا المنام ناوين نلاقي صباحو



الهمباتي الأغبش

ابشر يا التلب دونك نمايم طاحو

في تاية غناك اتلمو كل صلاحو

علعيل الوزن الغير دناك كتاحو

ادرج لي الحروف خلي الشجون يرتاحو



ود مسيخ

فرسان الحديث البي النميم إنداحو

جو إكابروني في الجرح النجض ضباحو

زولأ خالقو سرفو بي الجمال لا راحو

امسي الليلة عاز حلف البتمو صفاحو



بشرى قريش

لملم لي العجم وازنين حروف وفصاحو

مجنون الشعر خلوهو ، جيبو نصاحو

إن إنطبق السما ، كان الجوامد صاحو

ماني مبارح الميدان إما الدييك صاحو



الهمباتي الأغبش

زمنا مو قريب فاقد المسيخ صداحو

تراهو اليوم نزل قلب النميم اصفاحو

قول لي يا رفيق فوق اللذيذ مقداحو

اللما الجمال وخلي العقاب قماحو



ود مسيخ

الامياقو كم كاتلات قلوب لماحو

صابني الليلة يا الاخوان بواقي رماحو

المانعني ما كبت الغرام وجماحو

سئات البنات عن باب محاسنو إتماحو



الهمباتي الأغبش

الدرويشي كاتبو علي القلب في الواحو

نوبة ريدو داقة وباقي من مداحو

لو كان لي غفر دفق عليا سماحو

ماكان السهاد فاكك معاي اشباحو



ود مسيخ

زولي الزيو حير في الوصف شراحو

طبيب آلامأ أعيت في العلم جراحو

الخلاني ابكي علي السنين الراحو

ديسأ أعيأ بي خصلو الغزار سراحو



الهمباتي الأغبش

من وشو المنور طارو الخُصل وانزاحو

كاسيهو النضار حور العيون ملفاحو

الخلاني ممكون في بعاد اتراحو

مادد ليهو ايدي وليا مادي سلاحو



الهمباتي الأغبش

ريدا في القلب زايد عليا جماحو

كل ما اقول يحن يفرش علي افراحو

وافي معاك قلب دافع سنينو الراحو

راجيك بي الامل يحصد معاك تفاحو



الهمباتي الأغبش

كامدني السهر زايد عليا الحاحو

ها الليل تب كمل يامن ندهلو فلاحو

التاكي العشوق وجزّا القلب ضباحو

ريدو علي حشاي تب ما انعرف نقّاحو

مشكور منتصر على هذا التوثيق ودى دائماً المحرية فيك
ويسلم فمك الاخ الغالى صلاح الزبير وانت لبق حديث من شبيت
نرجوا منك اخى صلاح المشاركة والمساهمة فى هذا المنتدى وانت كنت دوماً مساهم ومشارك فى روابط الطلاب والروابط الاجتماعية .

ابداع ثم ابداع ثم ابداع ولكم التحية لكن رأي أن تجمع هذه الأشعار في كتيب ولو يساهم الجميع في ذلك لحفظ هذه الكنوز