ما عارفين حاجة ~ الساخر الفاتح جبرا

ما عرفين حاجة

الفاتح جبرا
elfatih.gabra@gmail.com

بينما كان أستاذ عوض ناظر مدرسة غرب الحارات للأساس ينام هو وزوجته الحاجة علوية فى حوش منزله الملاصق للمدرسة فى ذلك المساء الصيفى الساخن إستمعا لصوت هادر أفاقا على إثره من النوم ، تراءى لهما جسم لامع يدور فى حركة حلزونيه داخل ميدان المدرسة الفسيح .. سرعان ما هدأت سرعه الجسم وهو يتوسط الميدان وينزل عموديا ناثرأ حوله كمية من الغبار الذى ما إن إنقشعت سحابته حتى إتسعت حدقتا عينيهما ووقفا يتأملان المنظر .. الجسم مخروطى الشكل تحيط بدايرته السفلية نوافذ دائرية صغيرة لامعة .. يفتح نصف الأسطوانة العلوى ويخرج منه كائن ضئيل الجسم بعض الشئ ... حوالى مئة متر فقط كانت تفصل بين هذا الجسم والمكان الذى يقف فيه استاذ عوض وزوجته علوية .. الكائن يتجه نحوهما :
- (فى خوف وهو يتابع الكائن) : إنتي شايفة يا علوية المصيبه الجايه علينا دى ؟
كان طول الكائن القادم نحوهما حوالى متر واحد وجهه مثلث الشكل ويضع فى قمه رأسه شئ يشبه إلى حد بعيد هوائى التلفزيون
- (قالها بصوت يشبه صوت الانسان الآلى) : السلام عليكم
- وعليكم السلااام ... (في خوف) ألأخو من وين ؟
-أنا من كوكب المريخ .. أنا مساعد قائد هذه المركبة أما القائد فهو بالداخل
- وجايين هنا تعملو شنو ؟ ما لقيتو إلا الحته دى !
- لقد جئنا لدراسة كوكب الأرض !
- لكن تخلوا كوكب الأرض ده كلو وما تختارو إلا البلد دى؟ والله شقاوتكم شقاوة غايتو !
- جئنا إلى هنا بعد أن قمنا بدراسة أوضحت بأنكم شعب ذو تاريخ وحضارة !
- كدى خلينا من التاريخ والحضارة .. المصيبه اللابسا فى راسك دى شنو ؟
- بصوتة الآلى : هذا جهاز أضعه لأعرف به لغتكم وأيضا لأخاطبكم به !
هنا تفتح المركبة فينزل قائدها والذى هو صورة طبق الأصل من مساعده والذي بلدرهما قائلاً :
- الخارطة التى معنا وكذلك قاعدة البيانات الموجوده على المركبة تقول أنكما تسكنان فى عاصمة البلاد هل ذلك صحيح ؟
- نعم بالحيل
- إذن لماذا هذا الظلام الدامس ؟
- دى قصة طوييييييييييييييلة
- هل تمت طباعتها
- طباعت شنو؟ دى قصة ما بتتطبع بتتعاش بس ..
- إذن هل تستطيع أن تحكيها لنا حتى نتعرف على سر أصراركم على التواجد والعيش فى الظلام ؟
- لا أنحنا مش القاعدين نصر إنو نتواجد ونعيش فى الظلام .. ديل هم !
- هم مين ؟
- المسئولين !
- هل يخاف مسئولوكم من الضوء !
- والله من ناحيت بيخافو منو فهم بيخافو ..ويحبوا ليك العتمة موووت لكن دى ما المشكلة؟
- وأين تكمن المشكلة إذن ؟ هنالك لدينا فى المريخ إذا كانت هنالك مشكلة فلابد أن تكون مسبباتها معروفه !
-هنا فى هذه البلاد إذا كانت لدينا مشكلة فلابد أن تكون مسبباتها (مألوفة) !
- (علوية تهمس للأستاذ عوض) : هسه لو قلنا ليهم المويه ذاتا بتقطع سلوك راسهم دي بتضرب؟
- حسب ما لدينا فى إحداثيات الخريطه التى معنا فإن هذا المبنى هو مدرسة للتعلم ؟ هل يقطع التيار الكهربائى أيضا من المدارس ؟
- إنتا جاي من مريخ العرضة جنوب وللا شنو؟ الكهرباء بتقطع من المستشفيات محل الناس بتعمل عمليات تقول ليا المدارس؟!
يصعد الأستاذ عوض والحاجة علوية إلى المركبة بعد أن طلبا منهما ذلك وذلك لعمل جولة حول البلاد للتعرف عليها ، أقلعت المركبة بصورة عموديه وهى تنفث عنها كمية من الغبار والأتربه :
- لا تخف أستاذ عوض فنحن سوف نحلق على أرتفاع عال حتى لا يرانا الرادار ؟
- عندنا هنا كان عاوز الرادار ما يشوفك تطير (منخفض) !
- لكن الطيران المنخفض يري بالعين المجرده مما يسهل تعقبنا !
- غايتو ده كلام وزير دفاعنا !
- (وهو ينظر إلى شاشة أمامه) : ما هذا المصنع الذي مكتوب على لافتته (صافات) ؟
- هذا مصتع لتصنيع الطائرات؟
- أتصنعون الطائرات وليس لديكم نظم رادار متطورة؟هذا شئ غريب؟
- غريب الشويه دى ؟ والله تبارينا تدخل التجاني الماحي (بتاع المريخ طبعن) !
- (وهو ينظر حيث أراض جرداء تملأ الشاشة) : ماذا تأكلون ؟
- نأكل مما نزرع!
- وماذا تزرعون وكل هذه الأراضى جرداء !
- (مساعد القائد) : إنهم يزرعون .. ألم تر تلك اللافتة المكتوب عليها (مشروع سندس الزراعي) ! ما هى المحاصيل التى ينتجها هذا المشروع الضخم ؟
- كان قلت ليكم حاجه بتقولو سكان الأرض ديل عورا !
- كيف؟ ماذا تعنى ؟
- المشروع ده ليهو 22 سنه لحدت هسه ما طلع ليهو ليمونة وااااحده !
- يبدو أن الليمون يأخذ وقتاً طويلاً على كوكب الأرض حتى يثمر
- لا .. المشروعات هى البتاخد وكت طويل حتى تبدأ
- لدينا فى كوكب المريخ المشروع لا يأخذ من الوقت كثيرا
- لكن إنتو فى كوكب المريخ عندكم (تماسيح) ذى العندنا ديل .. !

كسرة:
ناس كوكب المريخ ديل ما عارفين حاجة ساكت !

كسرة ثابتة :
أخبار خط هيثرو شنو(ووووو)؟

والله الحالة صعبة اخي فضل الله كثير ما تحدث الاخ الفاتح جبرة عن جبروت وظلم الحكومة وفسادها لكن لا حيات لمن تنادي انا والله العظيم قبل كم يوم كنت في حوادث الطواري مستشفى امدرمان التعليمي مع مرافقة احدى الاقرباء والله العظيم حالة صعبة ، اول حاجة عفنة شديدة وناس تطرش وناس تموت من عدم الازعاف المبكر وناس تنزف ويعملو ليها في عمليات جمب سلة الوسخ ونقلات مليان ناس في الممرات وزحمة شديدة ونحن قاعدين من الساعة 12 لحدي المغرب حتى الدكتور وصل ومشينا العنبر والعلاج لسه ما بدا، ولم تتكلم مع الدكاترة يقولو ليك دي مشكلة دوله يعني عارفين الدوله هي السبب واطباء كلهم طلبه بتعلمو يعني باختصار شديد لو داير تموت امشي المستشفيات الحكومية ، وما تسمع مجاني تمشي الصيدلية اي حاجة مجانية مافي منتهية ، ونصفها تشترية بالقروش
يعني حالة صعبة ، انا اتمنى من المسؤولين اذا كان رئيس ولا وزير ان يسجل زيارة للمستشفيات غير معلنة ويشوف هل البيئة البيعملو فيها الدكاترة والبيستشفوا فيها المرض بيئة صحية ؟ ام موت وزيادة مرض ؟ الناس ديل ناسين يوم الحساب والله قايلين الله مافي ؟ مرتب الرئيس ونائبية الكرام ومستشارية ووزرائة الكرام لشهر واحد تعمل 6 مستفيات كبيرة نظيفة تخفف الضغط وتخفف العفنة والموت .
الشعب داير حاجات بسيطة ( علاج نظيف - مياه شرب - تعليم - لقمة عيش انشاء الله فتريتة).

و كل من ذكّر بهذا النقص و هذا التقصير، و هو حاصل في دوائر الحكومة طوالي يصنفوه معارضة و هو يقلل من منجزات الثورة ٠

» [b]من نصائح الساخر الفاتح جبرا ،،، ل (محمد احمد ) المواطن الأغبش سيد البلد سيد الجلد و الراس و لكنه لا يرى الجلد و الراس ، بل يرى ,, الجَّلِد و الباس ،، [/b]
» ليه الإستعجال - الفاتح جبرا
» ما كذب الفاتح جبرا و ما ظلم ٠
» الفاتح جبرا كمان و كمان
» الشريعه بالنص ..(وام بدون نص ) الفاتح جبر