تراث ...اغانى تصف الكرم والشجاعة والخصال الحميدة

عاجبنــــــــــي الكريــــــــــــــــم

غناء الفرجونى

عاجبني الكريم البسند الضعفان....
رباي اليتامي ومركز الضيفان....

من ماقام صغير مابمشي في الفارغه....
للجار العشير والدخري في الحوبه....
صاين عرضو راخص مالو للشكره....
ستار العروض البرفع الواقعه....
دابي الكركره اسد الخلا اب عاجه....
مدخور يالمشكر للبليه ان جات....

البارح صحيت بعد المساهر نام....
بي عيني بشوف برق الكرم قدام....
سايق الخير كتير هاطل سحاب وغمام....
يسند في الضعاف ويربي في الايتام....
اسمك عيسي ياك الشال دموع الهام....
كم حليت كرب فرجت امرا" هام....

غني وشكريهو يا خدرة الليمون....
صنديد الرجال مابنقدر بالهون....
يالحر المأصل يادهب شيبون....
ياضو الرفاقه ال للعروض مأمون....
سموك اللزوم القاطع المصنوم....
قضاي الغروض ال للفقر صابون....

تمساح اتبره الحجر ورود القيف....
يانمر الفروع في الغابه ماكا خليف....
الضل الضليل الفي هجيرة الصيف....
دراجك محنه وللمعاديك سيف....
ياشدر الهنا شايل الثمر عليق....
انت الشكره صح منك بتم الكيف....

غنت ليك بنيتا" موجت ديسه....
غنت ليك سعاد والدر وبلقيسه....
الخير والكرم عندك وقف ريسه....
ياضو القبيله الحقتو الريسه....
يوم تجي للرجال الحاره بتقيسه....
وتلقاهم نجوم هي ال للقمر ريسه




[center]

غير خالد ماليك تنين عرش دود الأربعين
السيل بوبا يا الفوتك مو دحين

تغني ليك أم هاني
ويشهدو أهل المعاني
نضيفا خاتي ريحة الشاني
كتل ديلاك خبرو جاني

يا القمره الماك شهير
يا الرأسى الماك صغير
أبوك بساطى القبيل
تبراهو الشعبه والجنزير

خت كرسيه للعديل
وكورك قال يا غفير
سيفه بدلي الجفير
العاداك وين يطير
شقيا صادف نكير

شدلوا ليك في أم سبيب
كشفن ليك أمات وضيب
القاصدنو منك ما بخيب
والف الشمس قبال تغيب

تغنى ليك ظبية الحدر
ما بتبلع من اصلو مر
المكنه فوقو بتكاكى
والمدفع تحتو بيخر
لا بيخاف ولا بيتر
قدام العينهم خدر

النعيم ودحمد
غناء خلف الله حمد

يا الأحييت سنن البرامكه
وعاجبني طول ايده سامكه
يا بابا قول النعيم درّاج المتابكة

النعيم يا فحل القبائل
كريم لمام الهمايل
شيتا براك ما أظنو خايل
ايدو أم ِرويق والقِبلي شايل

النعيم يا قاصدين لبا
خشمو انطبع لي مرحبا
هو عزيمتو ما بردخا
والبتسبل للضيف بضبحا

النعيم قادل وحدو
ما تكترو وتتقعدو
هو رب القدرة ساعدو
ختو لو الصحة ما فنتدو

غنيت لدابي الرجيمة
ما بحوى على البهيمة
هولك الشكرات قديمة
ما بشيل المال الفي القسيمة

أنا غنيت للولد
الاسمو النعيم ود حمد
وكت العيش ِبقى بالقبض
ديوان النعيم ولا بنسد
انت الكبرى الركز البلد

غنت ليك أم رشوم
هو مو لها وطق خُشوم
وكت العيش بقى معدوم
فوق ضهرو الولية تنوم


النعيم الشكر ليهو ُقلتو
بسبل بتوب سترتو
زي القمر في ُبهرتو
باجور شخرت ماسورتو

يا الشرفت القضا
ويا الحاكيت من مكوار بدا
خدامتو القعدا
هيِ بتدرِش قالت قضى

انا غنيت جبت وصفو
مكتوب الشرف على كتفو
ناطو ليه ما لحقو حرفُو
ديل القبيل ماكلنو حرف

صباحاتك ياعم والله كلام عجيب كلام ناس البطانه لاكين ابحث عن شعرا من المنطقه اكيد كتبو في الحماسه لاكين ملاقين مساحه اكتبو مع البطاطس والزراعه في ابن عمنا في ام كتي عماد الطيب الصديق قالو شاعرك كبير لاكين ماسمعنا ليهو حاجه

مشكوووور ود اخوى الطيب على المرور .
وشعر الجميعاب والجميعابيات بالاخص كتير لكن نسب معظمة لمناطق اخرى سبقتنا اعلاميا
وانشاء الله ننشر لك من المتبقى ماتقر به عينك
فقد جمعنا كثير من شعر الحبوبات وهو فى معظمه شعر مناحات وهو فى مرحلة التنقيح
وهنالك كثير من الشعراء نحاول ان نتحصل على شعرهم مثل الجد احمد على سعد
والاخ الاستاذ جمال عباس (نشرنا له مسدار موجود فى المنتدى باسم الرحيمة 9
واشعار الخال مدثر الطيب وهو مشهور بالشعر الرباعى
وايضا اشعار الخال محمود الطيب الفكى ووالدتهما الجده سعيدة بت على لها ايضا الكثير من القصائد
هنالك الكثير من الشاعرات لكن الامر يحتاج لاذن خاص منهن لنشر اشعارهن
لك الشكر الابن الطيب على حرصك لسماع اشعار جميعابيه ....

الواعي ما بوصو
كلمات بت مسيمس


الواعي ما بوصو
من أمس الضحى
تورى أب زنود ساقو
يا مقنع ولياتو

********
تور بقر الجواميس العليك الرك
يا عقد الحديد للحلبي ما بتنفك
تورك يا أم رشوم في الحلق عشرق
دقيت الجسر وحاجر مشارع الحق

*********
غنيت وجبت مسدار
المكنه بتكاكى وجنن مدافع النار
لفوك يا رحل الكحل دلوك ما بتندار
أمانة يا صقر ما تفرشت ليك برجال

********
غنيت وجبت نمك
بجر القول عليك يا مقنع الكاشفات
أسد الخلا الحجر اليويات
ساقوك لي الشنق
يا أبو أمنه حوبتك جات

*******
غنى وشكري يا خضرة الجٌم
طلع لي عشارى الليله مسكو يفوح
ما خطف البدينقه وما جفل مجروح
سيفو بياخد الخوده ومعاها الروح

********
أمك ولدتك ما ولدتم أتنين
تسلم لي يا تلبى البكيل العين
حالف يمين ما بكون بين البين
دقيت الجسر لي متعة الحيين

*********
غنيلو يا بنيه
من قومة الجهل ما قام لو بى نيه
وكت الشوف أشوف وقفولو سلطيه
تعدى وركز قال اخوكى يا رقيه

اخـــــــوي الما بنقدر

غناء .... مبارك حسن بركات


اسدا" جاكُم حايم
صاحي ما بتلقوه نايم
شادى الخيل أمات لجايم
أسد الخشش أب قوايم
هاشك فوق أم تمايم

النيل العم التراسه
البليغ من غير دراسه
خاتنلوا النظاره وراسه
شدوا ليه على أب جراسه
وقفل أبواب الفراسه

يا عازل هوي إنقرع
ده الأصل والناس فرع
الوافر ما بنضرع
سيفه وكتين ينشرع
بياخد الزول والدرع

ما شفت أخوك يا أم سماحه
العاصيات كسر جماحه
عينه للبعيد لماحه
الخيل الشبكن رماحه
شافنه وصدن قماحه

مـــــا تهـــــمــــوك بنمــــــيمــــه
بتكفى ضيفـــــان الهـــــجـــيمه
سيد بت فرج وسيد حليمه
القصدوا التار رضوا بالهزيمة

الآلاف درجن

غناء ...مبارك حسن بركات

الآلاف درجن ولدا نجيض ماك ني
البجرجر فى ام صقير وحدي
********
غنى وشكري يا اختو يا ريا
تمساح الكوانى الضارب الليه
سمعنالن خبرا في الهلالية
خمستاشر جواد سكن سبعمائة
*******
من قومة الجهل ما خوفوك باخ
تور بقر الجواميس الرقادن لخ
نقرولو أم هبك الضربخانه يدخ
قرنك بفتح الهامه وبمرق المخ
*******
أنا قولي ليك صحيح
ياركاب على شلق بنات الريح
ياجدرى النزيله الدم كرف في القيح
ادر صاقعة التلوي المقابله السيح
*******
ما بحركو الكشكيش
والقلب ان رجف ما بنفع الحريش
الجنيات براك في الحلة آفة عيش
ود المقدره البيعزم على المافيش

ماهو الفافنوس
شعر / بنونه بت المك نمر

ما هو الفافنوس ماهو الغليد البوص
ود المك عريس خيلا بجن عركوس
احى على سيفه البحد الروس
********
ما دايرالك الميته أم رمادا شح
دايراك يوم لُقاء بدميك تتوشح
الميت مسولب والعجاج يكتح
احى على سيفه البسوى التح
*******
إن وردن بجيك في أول الواردات
مرنا مو نشيط إن قبلن شاردات
أسد بيشه المكرمد قمزاته متطابقات
وبرضع في ضرايع العنز الفاردات
*********
كوفيتك الخوده أم عصا بولاد
ودرعك في أم لهيب زى الشمس وقاد
وسيفك من سقايتو استعجب الحداد
وقارحك غير شكال ما بقربه الشدّاد
*********
يا جرعة عقود السم
يا مقنع بنات جعل العزاز من جم
الخيل عركسن ما قال عدادن كم


هذه القصيدة هى متبقى قصيدتين مختلفتين احدهما لبنونه بنت المك وهو الجزاء الاول والاخر لشاعرة جميعابية تدعى فاطمة وهو الجزاء الاخير من القصيدة

فارس الحديد
غناء خلف الله حمد


ما حرس الجرى
صدرك موشح بالدمى
ما بخاف...........
فارس الحديد ان حمى

يا فارس الالوف الانت كفيتن
كشفت الدروع و شلعت خوداتن
فارسهن البخيت التم شكراتن
و صديت الخيول و قمعت ركباتن

من قومة الجهل ليهو الخوف ولا قسمو
مجبود فى المحافل فى الجود كتر عشمو
تدخل فوق بكانا النحاس خلف شتمو
و ركز البخيت الفال و النصر ختم

من قومة الجهل الخوف ولا كارو
الهوى و الشرق اتصنتوا افعالو
العوق اب صفوف قالوا البخيت شالو
مضروب فى الوجن ولا جانى بى شمالو

ما حضروا معاك اخوانك الصلات
قمزوا الخط على خيلا بقن غائرات
تدخل فوق بكانا حرابوا منشبكات
وجا مرهون على جفونوا الدمى سايلات

ما حضروا معاك اخوانك الديدان
قمزوا الخط على خيلا بقن ريقان
وقت الشوف اشوف صدرك ازم دلهان
سوالهم جهاد حمزة و على و عثمان