روائع الفنان عبدالعزيز محمد داؤود

مهداه لود الخالة وليد المجدع بالعطبراوى



أنــة المجــــــروح

عبد العزيز محمــــد داؤود

يا أنة المجروح يا الروح حياتك تروح
الحب فيك يا جميل
معني الجمال مشروح

للحب لهيب فى الجوف زيو الزناد مقدوح
منه الجبابرة تلين
لصوت بلابل الدوح
تصاحبو النسمات
تفضل معاها تدوح
من نغمة الأشواق
ومحاسن الممدوح

حوريه فى السودان بحبى ليكى أبوح
ياعنب جناين النيل
أتمنى منه صبوح
وانشد فؤادى الضال
بين الرياض مذبوح
أرى الهلال فى ظلال
تلك الخميلة يلوح

أنا لو ضمنتو رضاك اكون سعيد ممنوح
يا من تسر رؤياك
تفرح تنسى النوح
تكسو النهار بجمال
خديك جمال ووضوح
منو الغزالة تقف
فى موقف المفضوح

ناير كحيل نعسان انسان رقيق وجموح
ساحر العيون بجمال
فى سواك ما مملوح
ان كان تميس بنميس
ان كان تموج بنموح
عدل الطبيعة جعل
جور الحبيب مسموح
انا أهدى ليك الحب
حب من فؤاد مجروح
حب الشحيح للمال
حب الجبان للروح

عـــــــــــــــــــــــــودة قلب

عبد العزيز محمد داؤود

من زمن مستني عودة قلبي راحل..
كنت بكتب ليهو بي دمي الرسايل..
قلت فيهو اشعاري واتعذب ضميري..
كل كلمه حنان يفيض يغمر سطوري..
وكل حرف كتبتو من اعماق شعوري..
افتكرتو يرد رسالتي يرد يطمني في خطابو..
ما خطر في بالي يأسرني بعتابو..
وينسي اول مره اغراني بشبابو..
وكل ما ادلل يذيد اعجابي بيهو..
حبيبي كل ما ادلل يذيد اعجابي بيهو..
كنت شايف الجنه في نظرات عينيه..
حبيبي كان جميل من قلبو لو يرحم عذابي..
الدليل انا شايفو عايش في خطابي..
وكل ايام عمرو ولحظاتو الهنيه..
حاول يخفي شعورو ويدلل عليا..
ومن زمان.....انا من زمان..

الفنان الراحل ابو داود قمة من القمم الفنية السودانية و فوق ذلك فهو صاحب نكتة ظريفة و نوادره لاتخلو من الفطنة والذكاء و كانت له نادرة ظريفة أيام الرئيس الراحل جعفر محمد نميري ، تتعلق بالفنان محمد وردي و الذي سجن بعد محاولة انقلاب الحزب الشيوعي بقيادة الرائد هاشم العطا، و كان نميري في رحلة خارج العاصمة و برفقته الفنانون الاستاذ احمد المصطفى ~ عميد الفن السوداني ~ و الفنان حسن عطية ، و كان بين كل فاصل غنائي يطلب نميري من ابي داود أن يروي له نكتة ، فطلب الاستاذ احمد المصطفى من ابي داود أن ينتهز هذه الفرصة ويكلم ابو نميري في أمر اطلاق الفنان وردي ، و فعلاً عندنا جلس ابو داود جوار نميري فقال له وردي ؟!!! فما كان من نميري و بصوت جهوري و هو غاضب ، مالو وردي ؟؟؟!!فخاف ابو داود فقال له ,, عاوزين تعدموه متين ،، ؟؟ فكان صمتاً رهيباً ثم انفجر نميري ضاحكاً من ابي داود و قال له خير إن شاء الله و فعلاً عند عودته أمر بإطلاق سراح الفنان وردي ، منتهى الذكاء و حسن التصرف من ابي داود ٠ رحم الله الذين غادروا هذه الفانية و أمد في عمر وردي و متعه بالصحة و العافية ٠

ظاهر كده والحبر المرة نازل بالتقيل مادام جاب روائع ابوداؤود
لكن ده مابزحزح مكانه العطبراوى فى قلوبناو عشقنا لابوداؤود ياودالخاله
تسلم فضل الله على هذه الطرفة الجميله وهى تدل على سرعه البديهة عند ابوداؤود

وين كيف الحياه غير ليمك اتخيلتك لم تبداء كالمعتاد تبداء بها .
ياودالخالة مشاركتك ناقصة بدونها

ياودالحبر وين انت اظهر وبان
ليك منا هديه بعض طرائف ابوداؤود


من الطرائف التى يحكيها عبد العزيز محمد داؤود عن زوجته الفاضلة/ فوزية محمد حسين عبادي "رحمها الله" انها ابان الفترة الاولى من زواجهما ..
ظلت تسأل عبد العزيز كحال اي عروسة جديده تود ان تعبّر عن حرصها على زوجها ..
تساله:عبد العزيز ماشى وين ؟؟
يقول ليها: الإذاعة …
هى: وحتجى متين انشاء الله ؟؟؟
هو : بعد ساعتين ..
و فى وقت آخر: عبد العزيز ماشى وين؟ ..
هو: عندنا حفلة عرس فى امدرمان ...
هى : وبتجى متين انشاء الله ؟؟؟
هو: بعد اربعة ساعات
.. وهكذا من يوم لآخر..وفجأة بادرها يوماً... تعالي انتي يا فوزية بتسأليني كده، انا مؤجر منك عجلة؟؟

****

وايضاً يحكى ان ابو داود كان بغنى فى عرس والحفلة اشتغلت لحدى الصباح، ولغاية الوقت داك العروس والعريس ما جو، فهو لا شاف ليهو عروس ولا عريس لحدي ما الحفلة انتهت، بعد ما الحفلة انتهت قام قال للجماعة فى الميكرفون

انتو يا اخوانا عرسكم ده خبر ولا شنو

هاهاها تشكر ود الخاله طبعاً ابوداؤود مشهور بمثل هذه الطرائف
اذكر منها :

ي لقاء في التلفزيون مع ابو داؤود و فى فقرة الاسئله الخفيفة
سأل مقدم البرنامج الفنان عبد العزيز داؤود عن أسامي بعض المشاهير
يعني لو ما كانو وصلو لي الوصلو ليهو الآن كانوا حيطلعوا شنو .
قام المقدم سألو عن محمد الامين ، ابو داود قال ليهو شايل كوْرتو و قاعد جنب الجامع الكبير

وهو طبعا صديق لودالامين


وايضاً


أبو داؤود كان سايق عربيتو أشرّت ليهو واحدة
متحنكشة دايرة تملـّح
وقف ليها وقام شغل شريط خاص بيهو أغنية نعيم
الدنيا وهي طبعاً ما عارفة انها راكبة مع أبو داؤود في نص الأغنية سألها بتعرفي الفنان دا ؟؟ قالت ليهو .. ياي.. فنان شنو؟؟ دا حمار

قال ليها قلتي شنو؟!!!!

قالت ليهو قلت ليك دا ما فنان .. دا عبارة عن حماااار.. ياي ...

أبو داؤود وقف العربية
ونزل مشى على الباب الراكبة جنبو، قام فتحو
وقال ليها.. أها بتنزلي ولاّ أرفسك . ...

ولك ولكل الاخوان فى المنتدى اهديكم رائعته
زهرة الروض
وهى من كلمات الشاعر الكبير عمر البناء


يـــا زهــــرة الــروض الــظــليـل
جـــانى طــيـبك مـع النسـيـم العليل
زاد وجـــــــــــــــــــــدى نــــــوم
عـــــــــيــــنـــى اصـــــبــح قــلــيل
إمــــتــى اراك مـــــع الـــخــلـيل
واجــــلــس امـــامـــكم خـاضـع ذليل
دايــــما انـــوح اقــول حـلـــيــل
صـــــفى الـــقـــلــب القدرو جلــيل
كـــيف مـــا اســهر واكن علـيل
انـــا فــى الــثــرى وهــو فـى الاكليل
يــا الليك عــفــافك دايـــما دلــيل
يــا الـمن طيــبـك طـيـب زهـر الخميل
لــو مــر نـسـيمك على الف ميل
يــخــلــى الـعـالم طـــربــــــا يــمــيــل
يــا زهـرة روضك يبعث عليل
عــاشــق مــحــال لــلمـــــاك يـنـيـــل
بــســتـانــك نـضـيـرساقيه نيل
الحــــيـــاة ومـــحـــصــن بـالـدردنيل
يا اهــيـف يا ذو الطرف الكحيل
يا الـصدرك عالـى و خـصـرك نحيل
مـناى فى الــدنــيا قـبـل الرحيل
ارى شــخــصــك لـكـــن مــســتـحيل
امــتــى تــعــود ايــامــى القبيل
يــا حــبــيــبى واوجـد لــلـقــاك دليــل
ومــعـــاك نــتــحــادث قــلــيل
ويـــشــفــى داء قـــــــــلـبـى الـوبــيـــل
قال لى صـحيـح جـسـمك هزيل
وجــمــر الــغــرام لأ عـــضـــاك نزيل
لو مـا بــخـاف عـازلـى الرزيل
كــنــت بــوصــلك ولــى عــيــاك ازيل

سعدت مرتين مرة بروائع ابي داود و درره الغنائية الخالدة و مرة بطرائفه و نكته الظريفة الخفيفة و هي تأتي وليدة اللحظة فهي تدل على نباهته و فِراسته ، و لقد درستُ احد أبنائه و اسمه عمران و عند دخولي للفصل لفت نظري و بشدة احد التلاميذ فركزت عليه نظري طيلة الحصة مما أثار حفيظته و تنبه لذلك كل الطلاب ، و عندما انتهت الحصة وخرجت لحق بي و قال لماذا تنظر إليَّ هكذا كل الحصة ، و كان حينها احد الزملاء بالقرب منا فقال له بعاين ليك شديد لإنك ,, حلو ،، و هو طبعاً بينه وبين الحلاوة بعد المشرقين ٠ فضحكنا و قلت له أنا شفتك لكن وين مش عارف !! فقلت إنت اسمك منو ؟ فقال لي أنا عمران عبد العزيز محمد داود ، فقلت له عشان كدا أنا كنت بقول الزول دا أنا شفتو وين ؟ الزول دا أنا شفتو وين ؟ و كنت قد نسيت ابو داود في تلك الحظة ٠

الهديه مقبوله ابو البدوى
لكن برضوا منتظرين منك نعيم الدنيا.
انت يافضل الله ياخوى خلقت ابوداؤود غبتك كمان .
ذكرتى نكته تحكى عن واحد اخونا (مافى داعى لذكر الاسماء)
قالوا مشوا لى عرس برفقه اخيه الاصغر والزول شبع وشعشع وبقى يعايين لى اخوه ويبحلق فيه يقول :ياربى انا الزول ده شايفوا وين ...الخلقه دى انا شفتها وين

تسلموا
وجاييك يوليد بجميع درر ابو داؤود بس لوك الصبر
الامور عايزة شويه ترتيب

ماسكين فى حبل الصبر بس انت علينا ماتطول

رحم الله ابو داود و حليل أيامو و حليل أيام الفن الراقي السامي النبيل و الذي يهذب الروح و الوجدان ، أين نحن من الهابط الغث الذي يورث الهم و السقم من أمثال ,, القنبلة ،، و راجل المرا ،، و الكثير الكثير من الغث الذي انتشر هذه الأيام و طغى على كل راقي و رائع ٠كانت لنا أيام و كانت لنا أحلام و كانت لنا إبداعات و كانت لنا حياة لها طعم و مذاق ، فإن الفن الراقي المهذب يشكل وجدان الأمة و يهذب روحها ٠

ابن الخاله وليد لك ولكل الاخوان بالمنتدى نهدى اغنية نعيم الدنيا
مع خالص تحياتى لكم

نعيم الدنيا
عبدالعزيز محمد داؤود

كيف الحياة غير ليمك
من بعدك اصبح حظى زى لون هضليمك
يانعيم الدنيا
***
ياحليف الخضرى التايه فى نعيمك
مادام هاجرنى ارسل لى نسيمك
يانعيم الدنيا
انعش لى روحى بندى جسيمك
او طيب المسك الفائح من تبسيمك
يانعيم الدنيا
***
يا امانى حياتى البيها نور هضليمك
يتمنى التبر يلمع كأديمك
يانعيم الدنيا
مشتاقه الشمس تظفر بى ليمك
تأخذمن نورك تلثم لقديمك
يانعيم الدنيا
***
يافرع البانا يافرع البانا القائم فى خميلك
من قامتوا حبيبى متعلم ميلك
يانعيم الدنيا
يابدر التم امابتم تكميلك
لو ماتجعل محبوبى زميلك
يانعيم الدنيا
****
سيوف الهندى من لحظات عينك
ليه بيها تصيبنى أش بينى وبينك
يانعيم الدنيا
غير كونى بحبك وحياة خدينك
بعد عنى صدودك ياسيدى ودينك
يانعيم الدنيا
***
ليك حق فى صدك وتيهك وتدليلك
ليك حق تهجرنى يكثر تعليلك
يانعيم الدنيا
مادام حسنك فردى وغالى فى جيلك
تمتاز بالعفة المانعانى اجيلك
يانعيم الدنيا
***
مع هجرك وصدك مازلت اريدك
ومنام عينيا بين خدودك وجيدك
يانعيم الدنيا
تيه بين نعيمك مولاي يزيدك
ضيعت حياتى تسلم لى ايدك
يانعيم الدنيا

تسلم ود الخاله ولك التحيه ولو ماعارفين انك بقيت ضابظ عظيم
كنا طلبنا منك تنزلها لينا بصوتك الشجى
وانا بدورى اهديها لاخوانا عزابت المنتدى مع التحيه .

الهدية مقبولة ياابوبدوى ويللا واصل وبدون فواصل فى ابوداوؤد

استاذ فضل الله كيف حالكم الكلام ده بينى وبينك كلوا ليكم لكن مابنقدر نقول ده بصراحة عشان كدة منلتف على الموضوع بالاخوة العزابة علشان ماعندهم رقابة دولية ونحن خائفين عليكم من الحكومات .