قصة حمد ود دكين زعيم قبيلة الشكرية مع طه الراعي في قبيلة البطاحين

[size=18] :
قصـة ود دكين مع طه
تروي الروايات ان هذه الواقعة وقعت حوالي عام 1818 ميلادية وكانت الواقعة الشهيرة بقتل أحد فرسان البطاحين حمد ود دكين زعيم الشكرية واحتمي البطاحين بابناء عمومتهم الجعلين وعلي رأسهم المك نمر وكادت الحرب تقع بينهم ولكنها انتهت الي الصلح .
وصور الشاعر الكبير إبراهيم العبادي هذه الواقعه مع إضافات أدبيه جمه ومحسنات أفضت بها إلي مسرحية شعريه بقت أثر عظيم لتلك الواقعة التي تناسي التاريخ سببها الأصلي وبقيت أبيات الشعر وألحان القوافي .
هذه المسرحية قدمتها فرقة الرواد المسرحية على خشبة المسرح القومي بامدرمان
في العام 1968م و استمر عرضها حتى عام 1971م وقد لاقت نجاحا واقبالا شديدا
خاصة بعد أن طافت أقاليم السودان حيث كانت مدينة شندي آخر محطة للعرض
ثم تجمعت الفرقة مرة أخري و قدمت آخر عرض لهذه المسرحية على خشبة مسرح نادي
العمال بالخرطوم وكانت المناسبة هى عيد العمال و كان ذلك في العام 1976 بحضور الأستاذ إبراهيم العبادي .
فرقة الرواد المسرحية كان معظم أعضائها من العمال في النقل الميكانيكي ومصلحة لمخازن والمهمات و كانوا هواة يتمتعون بموهبة عظيمة في التمثيل .
كانت المسرحية من إخراج المرحوم احمد عثمان عيسى وقد لعب هو نفسه دور طه،
المرحوم ميرغنى خليفة عثمان لعب دور حمد ود دكين .
الأستاذ إبراهيم حجازي لعب دور ود النعيسان
ابراهيم احمد حمد لعب دور المك نمر .

الحلقة الاولي

قال طه :
أخوك يا ريا وكت الخيول يدبكن
أخوك يا ريا وكت الرماح يتشبكن
أخوك جبل الثبات وكت القواسي بحبكن
كم بكيت وكم قشيت دموع الببكن
قالت ريا :
وراك أسود علي ما نمت اسع طيب
قال طه :
بسم الله قولي أخوك طيب طيب
نصيح وشديد حاضر قلبي ماهو مغيب
إلا الشفتو في النوم من هوايله يشيب

الزول في الصحي مخدوم عليه شقاهو
وإن غمض شويه تجي الهموم لاحقاهو
الصف ابلبوس أنا ما بخافو لقاهو
ياليت الحلم في صحيا كان بلقاهو
كان خير ولا شر بلقاهو مابهم بالي
وحارسني الثبات من الكبار قبالي
وكت هسع صحيت وشفتك سالمة قاعدة قبالي
ان اتخلبت الكون تاني ماني مبالي

قالت ريا :
كعب نوم النهار أمس العصير كنت نايمه
رأيت قدام الفريقنا أشوف صقوراً حايمه
كبيرن غار علي من نومي تبيت قايمه
صحيت مهجومه لا مفصل ولا في القايمه

قال طه :
وانتي كمان رأيتي صقور عباره غريبه
علامتا كافية ظنيت الحكايه قريبه
هاك مني الصحيح الما بتدخلو الريبه
هادي الحله بي عيني أشوف تخريبه

قالت ريا:
تف الشينه ليه فاجعني ليه يا طه
انت الدغري وانت الكاشفه ياك غطاها
كان الدنيا هادي العقبة تتخطاها
ما بضلل سماها وما ابتشيلني وطاها

وقعدت ريا تبكي:
رد عليها طه وقال :
ما بفيد البكاء وكلامي احسن تنسي

قالت ليه ريا :
كيف ما أبكي وكيف أفوت مراتع أنسي
افقد كل شي عزي ورجالي وانسي
تطلق فوقي نار عقبان تقول لي أنسي
كنا في سيرة لقاء طه وريا وهم بيحكوا لي بعض قصة الحلم

قال طه :
فال الخير أخير ما شفنا شيناً جدت
كلا لشفنا أحلام في طريقه إتعدت
قبل الليلة إيد لحمان قطْ ما اتمدت
ما بنهد شرفنا لو السماء إنهدت

قالت ريا :
خير إنشاء الله خير والخير مساك وصباحك
والفال السمح فالك يضوي مراحك
بالضيفان أشوف عامر تملي مراحك
شينك ما أشوف وأشوف هناك و أفراحك

قال طه :
خير الزول يقول مهما الامر يتهول
قالوا الناس علي فالو الحلم يتأول
غاية الحي فناه إن كان قرب إن طول
يترك ذكرو والناس الوري بتتقول

قالت ريا :
وريني الحلم التورك مذهول

قال طه :
أصبري لي أروق حبل الفكر مبهول
احكيلك شنو الشفتو والله مهول
شفت الوحده شفت النار وشفت الهول
أحكيلك تمام الشفتو ما بتغابه
جايين العصير أنا وإنتي من الغابه
سايقه ليك بهم قدامي بي رقابه
بينا والفريق إتولعت تقابه
قدر ما نشوف بعيد قدامنا نلقي حريق
وقت النار علت ما شفنا تاني فريق
باصرنا المروق ما لقينا لينا طريق
تشكي من عطش واخوك يابس ريق
فترتي قعدتي , انا محتار جلست وراكى
حاقبه الدرقة ختيت سيفي فوق أوراكى
وكت بعد البهم لى قسعو قمتى براكى
غسعتي وجيتي ومعاك كم صقور تبراكى
تبت بي عجل شافنى جفلن و طارن
غابن من عيوني وفي اللعوت اتضارن
ما غابن كتير جن يقدلن يتبارن
قدامن كبيرن عينني وغارن
سل السيف ولاقاهن أخوك يالضامره
تور عنز أم هشيم الفي المجامع دامره
سيل تلوى اندفق فوقو السحائب هامره
حجر الصاقعه فرتاك الصفوف العامره
بادرني الكبير ديك إستعدن وقفن
ما مهلتو طار راسو وجناحي يرفن
طارن ديك وقت بي ريشو رقد اتكفن

قالت له ريا :
عارض ومات خلاص لي الليلة يمكن عفن
بعد ان بدأ طه يطمئن ريا اراد ان يقطع الشكوك والمخاوف من تحقق هذا الحلم بالزواج من بنت عمه ريا فقال :
نحمد ربنا الليلة مات عارِضنا
وان كان عمروا طال يا ريا كان قارضنا
يلحقوا بي عجل ديش همنا المارضنا
نبدا زواجنا بكرة منو البيجي يعارضنا
بطال البعيش في الدنيا اصلوا غناه
ان كان مالو راح غير اهله مين يدناه
سمح لبفوق اساس ابواتو تمه بناه
والزول دون قبيله غناه شن معناه
ما بنفرح بي مال ونقول كفانا ورثنا
نفخر بالرجال في الحارة يبقوا ترسنا
نجمع ناسنا هيلنا من الكبار حارسنا
يحضروا اهلنا فرحانين يباركوا عرسنا
كل بطحاني يفرح بي عرسنا مناه
ساعة جمعتن بيتنا يتم بناه
عذاب عيش العزب يا ريا مر ضضقناه
سمح الزول صبي يد ويربي جناه

طبعاً ريا ما قبلت الكلام ده لانو ابوها عبد الله المعروف بابو كبس ما تمّ سنه من وفاته والناس في حالة حداد فقالت :
ده الاعوج تراه والشين نهايه حدو
إن شاع ده الخبر يملا الفريق لي حدوا
يقولوا ابكبس من دخل ود احدو
فرحوا وعرسو لا موجعن لا حدو
إن كان في الفريق ماتت مريه ذليله
لي الحول يرفعوا العرس الدخلتوا الليله
خليه ابكبس راجل الرجال ودليله
إن كان بي قبيلة تعدوا تبقي قليلة
خليه الكلام وعرسنا في ده الحال
من بالك أمرقو محال والف محال
علي ميتت ابوي لي الليله حول ما حال
نصبح بكره ونسه وبهادل حال

رد عليها طه وقال ليها :
الموت ما شمت غاية البخود والببروا
والموت والحزن ما جابو زول من قبرو
الزول في الشدايد أولي يلزم صبروا
يترجي الكريم مولاه كسره يجبروا
بنخاتر منو الوجعه هيلنا برانا
نحن أهل المصاب والناس عزا مجابرانا
في آخر المراح دايماً تجي الفترانا
هادة الحد ندوس والناس عقب تبرانا

بعدين ريا شافت تحسم موضوع العرس ده مع طه وانه لازم يتم السنة كالعادة المتعارف عليها في الحداد :
فقالت :
الناس بالمكارم والفعال بتباهو
زي الفطرة ينشا الزول حسب مرباهو
عاة جدو عادتو ونحل ابوه نباهو
يلبس ثوب قبيلته ان داره ولا اباهو
من الليلة حول مضيوه تاني اتكلم
الدايروا بيتم رب العباد ان سلم

رد عليها طه :
تاني امضي حول وانا بالحسار اتالم
علي حكمك صعب انا قابله ما بظلم
نستني السنة قاسية وصعيبه علينا

ردت عليه ريا :
تم الاتفاق من الكلام خلينا
زي عادة البلد لا زدنا لا قلينا
إن شاء الله السنة بي خيرة عايده علينا
يا طه البهم قرب رجوع سراحو
بنات واولاد ديك ناس فريقنا الراحو
نصيحة سمعتها من الكبار الراحو
قالو العربي ما بنعز كان ما مراحو

وتقوم ريا فايته علي الفريق وطه يعاين فيها وهي ماشه ويقول :
ياليت السعادة ان كان بقت ايديه
كنت اعيش غني في الدنيا بالزنديه
علي حكموا ناسي الفي اخذوا الديه
اموت بالعطش والمويه بين ايديا
اه ياريا قاسية وزايده في التفنين
اه يا رب ارحم صبري امس ضنين
يمحف ديه السنة ربي الحليم وحنين
يخصمه من حياتي رضيت بعشرة سنين
كيف اتهنا واعيش وانا صبري ولا مودع
وسبب الرخرخ المن قام صغير متفدع
جنيت وجني جن وحالي اصل مبدع
اهج في الجيش اهج فاضلي تاني اجدع

وهنا ريا داخله علي الفريق لاقوها خمسة عرب راكبين زواملم " وده بداية الحلم الشافتوا ريا وشافوا طه " العرب قربوا من ريا قام واحد من العربان المع ود دكين شيخ العرب نادي ريا وقال :

بالضيفان تمري لا لام لا كلام
صدقوا اهل المثل توب العرب صح لام

قامت ريا ردت عليه :
حبابكم عشرة ومن دون كشرة والف سلام
يا وجوه العرب المتلي ما بتلام
انا بت الرجال اهل الدرق والسيف
بت الما بهموا بي حساب الخريف والصيف
بت البحجو لى المرقوب بكرموا الضيف
انا ريا كان شفتكم افوتك كيف

قام العربي قال ليها :
من وين في الاهل كفاك فخر يا بنية

ردت عليه ريا :
انا بت البيوت المن بعيد معنيه
بى فوق السما نفوسنا وبيوتنا حنيه
انا بت ابكبس في النسبه بطحانيه

قام رد عليها ود دكين طبعاً عرفها انها هي زولتوا العاوز يعرس زاته فقال :
عبد الله ابكبس عز البطانه وفخري
في راس العرب بنعد ماهو الوخري
كريم وهميم كان للقبائل دخري
بت شيخ العرب هيلك صحيح تفتخري
توقد ناره ديمه الما بكوس الجمره
وفي الضيفان يهوش سكينو دايماً حمره
بي كاس ما عبر لبنو بيجيك بالعمره
هيلو الشكرة هيلو الرئاسه هيلو الامره
المرحوم ابوك كان للقبيله غطاها
عزك قديم عمك حسين ابو طه
ان شاء الله اخوك دي السكه ما تخطاها
بقصد بيها ود عمها طه يعني هل هو في مكانه ابواتوا

فردت عليه ريا قايله :
كما يسد مكانن قدموا ليش يوطاها
( يعني ماشي في الواطه ليشنو غير اكرام الضيف واغاثة الملهوف(
لا يفوت ولا يموت الساحتو يوت مغشيه
تقابة الفريق يوقد صباح وعشيه
زايد في الرجال طالق قفاي ووشيه
ضيوف الليل بكفيهم مرارة وشيه

رد عليها و دكين :
ما دخل التراب البركه في الذريه
والخلاك وراه ما بقولوا مات يا ريه
دايما في القبائل سيرة ابوك مطريه
بيكي وبي اخوك تزيد وديه المحريه

قام واحد من العرب داير يعرفا انه ده شيخ العرب ود دكين فقال :
ما بتسألي لامن وين ولا وين ترسو

قالتلوا ريا :
كيف العربي يسأل ضيفو كيفن تنسوا
أول بكرموا ويخابروا ساعة أنسو
من مقلب حديث يعرف أبوه وجنسوا

فرد عليه العربي :
عملتي حسابو ضيفك وكرموا وجبتيه
يخجل كان سألتي وإسمو ما عرفتيهو
إسم شيخ العرب سامعابو ما شفتيه
(داير يوريها بان حمد ود دكين راجل غني وراجل كذا وكذا000 عشان تقبل بيه)
ده خريف البطانة الفيها مالوا مشارك
هيلو السارحة هيلو الصاهله هيلو الباركة
ماوقع لك كلامي ساكتة لي شنو اخبارك
فخرك ود دكين جاك في فريقك زارك

ردت ريا:
مرحب حبابو العزو ماهو لفايه
اب نارا تولع للضيوف دفايه
بي شيخ العرب الافتخار ماكفايه
تابعو انت جانا نفخربو ونخدموا حفايه

رد عليها ود دكين:
بارك ربي فيك عقلك يدوم ياريا
كرمك ماهو كلفة ديه طبعتك فطريه
اياك بت التلوب والسمتة فيك محريه
قديم فوت البطاحين عزة للشكرية

000

في القت داك جاء طه ووجدهم واقفين فقال :
مرحبتين حباب مرحب خريفنا الزارنا
حباب شيخ العرب اتشرفنبوا ديارنا
حباب راس العرب البيهو كل مدارنا
تنزلوا في الدرب مالنا ماتت نارنا

رد علية شيخ العرب :
حباب طه الضرس والفي الصهيباب راس
الجود والكرم هيلك قديم ميراس
نارك مابتموت ياولدة الفراس
قاصدين ام شديدة ومعانا عوجة راس

رد علية طه :
لعدوك العوج يالفي الكبس سراي
راسك مابدوس مليان رجالة وراي
ياشيخ العرب لاكن تختوا كراي

طبعا شيخ العرب مافهم كلمة كراي ديه فقال لي طه0000

هادي الشورة ياطه الغلبني دليله
كل البلزمه القاهو فيك قليله

رد عليه طه شارح ليه كلمة كراي
كراي الدايرو تبقوا ضيفونا انتوا الليلة
ترقدوا في الفريق حتى ان عشانا بليلة

رد علية ود دكين :
مسكنا الدرب اسرع قوام ماتلعب
دارك ديمه عامرة السمح ما بكعب
يكفينا الوصف لاتشد جمل لا تتعب
وهدنا الطريق عقب الوصول مابصعب

رد عليه طه :
يمين تغشوا الفريق بتفوتوا نحنا مقابر

رد علية شيخ العرب :
عامر انشاء الله ديمه اياك مرسي العابر
مشطوطين خلاص مسكنا في دريب جابر
نخاف عوج الطريق منو لي المقدر خابر

رد عليه طه :
دريب جابر مزم والسكة سالكة ورايقه
فرقان مابتلاقيك مابتعوقك عايقه
اخذ خاطرنا نحنا قالوا واصلة السايقه
بتراوح ام شديده باكر زواملك فايقه

رد عليه ود دكين :
الزول ان وعد شين ميعادو يخلفو
في ربط اللسان يخابو دمو يتلفو
سفري الليلة فيه زولين مابختلفو
ضروري اصل ام شديده على وعد بي حلفو
مابعرف ازوق من نشيت تبيت
فريقكم لي فريق وبيتكم يمين لي بيت
اجيك دينا علي حتى ان بقيت حبيت
هاك وعد نجيض ارجانا بكرة مبيت
شوفتي للفريق ايام بكى ابواتك
مو غابيني حالو وسمعتى بي نخواتك
فريقك بكره ضيفوا مابفوتوا وحاتك
الا احققك وبراي اشوف نفحاتك
ياود الهميم النفسوا مامعارضاه
كرم الضيف عليك مكانة ابوك فارضاه
جاييك في امر ان تابه وان ترضاه
غيرك مابكوس واملي بس تقضاه

رد عليه طه :
غرضك مقضي كان احتاج لي خيل وجمال
والضان والابل سارح يمين وشمال

رد علية ود دكين :
بي دمي الغرض اقضاهو خلي المال

المهم طه زي فهم شيخ العرب وده ماشيلوا جاي وطه ماشيلوا علي المال

فرد علية شيخ العرب :
دي المأموله فيك وين الدرب خترنا

رد عليه طه :
دربكم في السلم

قالوا شيخ العرب :
والله تب ماودرنا
بكرة نجيك ان قلينا ولا كترنا
وهنا ود عهم شيخ العرب وسار بي جماعته قاصد ام شديده وعلى اساس في اليوم الثاني ينزل ضيف
على طه وقبيلة البطاحين

وفي اليوم التالي طلع طه مع ريا منتظرين ود دكين حسب موعده معاهم وفي الحديث قال لي ريا
في البال لي ضمير شيخ العرب متعوب
قايم نفسه يختف في الكلام مرعوب
ما خاتيلوا شيء ماشفتي كيف مرعوب
حمد ود دكين مرتع دياروا وربعو
ده الشي السمعتو من الاباء والتبع
الراجل فعايلو ببين لك طبعو
انا ود الخلا البعرف اسوده وضبعو

ردت علية ريا :
اعوج كان يخلف الليلة ميعاد جيتو
رجال وحريم كل اهل الفريق في رجيتو
قطعو السارحة كل زول في مراحو سعيتو
كبار وصغار كل راعي خلا رعيتو

قال ليها طه :
محال يخلف محال قال جايبو غرضا عندي

ردت عليه ريا :
كان غرضا صعب 00000
فقالت لي طه
كان غرضا صعب

رد عليها طه :
كان راس نمر في شندي
اوعدتوا اقضاه وابذل كل جهدي العندي
كان بالمال وكان بالراي وكان بي زندي

قالت ريا :
هيلك من قديم انت البجيك تحجالو
لكن وددكين عامر بدين برجالو

قال ليها طه :
ياريا الكلام ده اخير تقفلي مجالو
وكت اوعدتة بقضالو غرضو الجالو

وفي وقفة طه وريا يجوهم ثلاثة من ابناء البطاحين عبدالله وخلف الله واحمد
قال عبد الله :
سلام ياطه

قال طه :
مرحب بي كبار قبيلتي وعزي
مرحب بالاسود البفقعوا المستهزي
ريا جات قبيلتك فوقه انكعي هزي
وان زحينا يوم الحارة قرنك جزي

ردت علية ريا :
اولاد بطحان تعيشوا ويزيد مراحكم ناير
وناركم في سرات الوادي تهدي الحاير
بتحلو المضيق وتصدوا غارات الغاير
ماهيلم يزحو كان يزح الداير

قام خلف الله لما سمع الكلام ده خاف وارتجف واصابته خوفة
فناداه عبد الله قال :
خلف الله ولدي اقعد قبال ود عمك
كلام ريا هادا بشوفه غير دمك
من زمن بعيد اتمنى اسمع نمك
فرج همنا مولاي يفرج همك
دوبينا 000 دوبينا 000 قول

قال خلف الله :
الولد البخاف من القبيلة تلومو
بخلف ساقو فوق تيسا رقيق قدومو
اما يجيب رضوه البهم البينقر فومو
واما تخامشن قدح الرماد حرومو
سنابك حضر الطافة وجرايدك نوا
كورك سال ومزيقا ورطانة وعوا
الخلاني فوق نار ام لهيب اتلوى
النوم شفتو ياقرد القلوع شن سوا
اكل الشلخة لامن كمل المنسية
شمخ الحوري لبعصة عريب بت ريا
كان ما اسكت الباكيات واخلف الكية
قوله ابو فاطنه يالصادق خساره عليا
خرير دوماتو فوق عاجن رسن متلاقيه
يالغول النقيب سويلو سوق الساقيه
بت معز الخلا الفوق الكجر متاقيه
عكرناها يا امروبه النشوف الباقيه

وبعدين ظهر ود دكين في جماعته جايين علي الفريق
فقال طه :
هداك ود دكين بي زمله بان شفناه
دار اليوم يروح خلف الوعد خفناه
الراجل في الاصول ماخاتي لي معناه
يا ريا استعدي الزول جمعنا عناه 00

شيخ العرب قال :

ولاد بطحان سلام اهل النبا والشكره
سلام عز العرب اهل الفحل والبكره
سلام ياطه ياراس الكرم والضكره
جيت لي غرضي ياطيب الاصل والذكره

رد عليه طه :
مرحبتين حباب مرحب خريفنا الرازه
حباب شيخ العرب البية القبائل عازه
حباب سيف العرب البيه هاشه وهازه
في يمينك قبيلتا مابتقبل فازه

قام عبد الله قال :

هيا جايهو الزمل

رد شيخ العرب :
خليه ياعبد الله
غرضي ان كان ما انقضى انا زملس مابتدله

رد عليه طه :
الناس في رجاك من الصباح في مله
كدي شوف الطعام شيخ العرب بسم الله

رد شيخ العرب :
ما باكل طعام كن ماحسابي اتضرب
وقضيان الغرض فيكم حقيقة مجرب
الامر العنيتو وجيتو كان ما اتدرب
ما بنفعني اكل ومابيرويني مهما اشرب

فقال عبد الله وقال :
يا شيخ العرب امرك خلاص همانا
قول غرضك عديل خصصنا او عمانا
عسى نقضي ليك في محلنا اللامانا
كان بي مالنا كان بي بالنا كان بي دمانا

رد ودكين 00 شيخ العرب :
عندكم الغرض لابدور قلم لا ورقه
ماغرضا تسافرولو وتقيسوا الفرقه
يقضى ان قولتوا خير مابدورلو سيف لادرقه
وان قلتوا لا يروح شمار في مرقه
ما مقبوض وماجيتكم لاجي فوقي جنيه
بي خيري ومراحي وتاني نفسي غنيه
جاييكم نسيب تدوني بطحانيه

رد عليه عبد الله :
خير سميها

رد ود دكين في بت اكبس لي نيه

قام عبد الله رد عليه 00000
قال عبد الله :
يفتخروا البطاحين ساحتم راحبالك
لكن ريا امرها مقضي من قبالك
من دون ريا قول الدايرو في بالك
ده فريق الصهيباب مافيهو واحده حقيره
مال ورجال وعز في الحله مافي فقيره
كثير الزي ريا مليان البلد من غيره
ان درت الكبار وان كان قصدت صغيره

قام شيخ العرب قال :
ان مال الشجر مابتكسرن فراعو

[size=18][size=18]وقمحان الطلب لي المابجيبه ضراعو
ليه يا اهلنا للبيناتنا ما بتراعوا
القال راسو موجعو يربطولو كراعو

قام عبد الله قال :
حبل المهله يربط انت ارتاح بيت
بكره نمر سوى ونلف البيوت بيت بيت
سمي الدايرو ولوم البقولك ابيت

ردعليه شيخ العرب
يمين بالله غير الغايه مالي مبيت
هنا طه حزم الكلام في نفسه لانه شيخ العرب بينوا ليه انه ريا مخطوبه وبعد ده بصر وبجادل فقام طه وقف وقال :
ياشيخ العرب امرك بشوفو حقاره
وما جايباك مراء (مره) الجابتك بس غاره
وقرناك كثير ونفسك ابيتا وقاره
خبرك هادا مادايرلو دق نقاره

قام واحد من اعوان شيخ العرب اسمه علي ووجه الكلام لي طه وقال :
قبلك في اللجج ياطه راحو الهدو
تتجاسر علي شيخ العرب بتهدو
زولكم ما عقل ياكبار كان ما تهدو
بي عنادو الفريق خايف يسبب هدو

****
هنا جو المجلس توتر وقام طه قال
انا المالح الكارب خريفي وصيفي
المثلك تبيع مابطول فوق قيفي
كان ما الليله في بيتي وبعدك ضيفي
في الشي السمعتو برد عليك بي سيفي

هنا قال شيخ العرب :
كفى يابطاحين فيكم اتغشينا
كرمكم جانا طامح رخصه اتعشينا
بعد الشيء السمعنا كان مامشينا
خايف في اجتماعنا تقع وقايعا شينه

في وداعة الله عقب بيناتنا مافي علاقة
وات ياطه اتشفيت شبعت شلاقه
عمرت الشر سعيت دليته بي معلاقه
نحن وانتو بعد الليلة يوم نتلاقى

قام عبد الله عاوز يرضي شيخ العرب ود دكين فقال:
من ولدك زعل كل البلد بتكاورو
ارحكم بيتنا بيتو ونحن زولنا نداورو
نتدابر نشوف نحزم جمعنا نشاورو

رد علية شيخ العرب :
ضيف الغابه حالف ده الفريق ما اجاورو
قام عبدالله قال :
سمح ارجانا يمكن طه نحن نجبروا

رد عليه شيخ العرب قال :
الزول في الرقاد شقو البريحو بخبرو
والزول البليد بي ايدو يحفر قبرو
عاد بنسوي عوسنا وطه يلزم صبرو

رد طه علي شيخ العرب وقال :
سوي الدايره وكتر الكلام خليه
والشر القصدته معاي ابقى عليه
طير اصل السماء حتى القمر دليه
يوم نتلاقى كل واحد بعرف الليه

هنا خرج شيخ العرب ود دكين وعيونو يقدح منها الشرار وكبر الشر في نفوس الفريقين

وقام طه جاري في ظهر شيخ العرب 000 وقام واحد من البطاحين اسمة احمد مسك طه وقال :
ااقيف ياطه عندي نصيحه ليك ابداها
العقدة الصعيبه العاقل بتعداها
الشكرية كتره نحن مانلداها
انا عندي العرب بي ريا اخير نفداها

رد عليه طه :
خلاص ياحمد تراك بفكرك
روح لود دكين ورية يسمع شكرك
يديك مال كتير وقبيلتو ترفع ذكرك
تصبح عمدة فوق رؤوسنا تخلف حكرك

جاء عبد الله برضو قال لطه غايتو اتعبو خالص وقال ليه :
ليه احمد تهينو ، نصيحتو موضاراك
موحق النقص انت بتعرفو براك
وكت بتسوي عوسك ومابتشوف بوراك
نشاور ريا امكن ريا مودايراك

طه :
صدق اللقالو خربانا البلد بكباره
هديك ريا اسألوها واعرفوا اخباره
من غير السفر ماعندي تاني دباره
نحن وانت بيدي الحاله مابنتباره

احمد :
ياطه المصاعب للقبيلة تقودا
مسافر وين مخلي النار بوراك موقودا

طه :
انا السمتان جليس الردفولا عقوده
حد السيف بقطع عقدتو المعقوده
ماولعت نارا انتو تقعو فيها
شن دايرين براي وانا ناري مدفيها
احلف ليك يمين دي الحلة متقفيها
باكر من صباحي قبل يحس الفيها

عبد الله :
نحن كبار اخيرلك ترضى بعرفتنا
مع الشكرية احسن نشتري الفتنا
ندي ود دكين ريا ونكتل الفتنا
ما من خوف ملاقات الرجال حرفتنا

طه :
من الفيها مابزح ان تزحزح مره
وان حين نعود ان طال زمنا ومره
عيش الدنيا ان كان حلوه وان كان مره
الزين مابدوم والزول بموت فت مره

عبد الله :
وقت صممت ماترجع وتسمع قولنا
وسفرك دا محال مابقبلنو عقولنا
الموت مابنخافو الخوف يمين مو هولنا
بنعاين بعيد بنخاف بهادل عونا
الشكرية بسيوفنا صغيرنا معتق
مابنابا القتال ونقول جرحنا اتفتق
مرحبتين حباب الشر محل مابتق
تنقد الرهيفه انشاء الله ماتتلتق

طه :
لشكرية غوش واكتر علينا حساب
وضيف ليهم يمين مابتربطو الانساب
انا لغارتم حسبت الف حساب
تتعدوا راي يمين عذابكم ساب
بجيكم حمد ومعاهو الرجال تابعاهو
قولولو طه طفش وريا معاهو
كيف نرضى السفيه الادبه مابرعاه
يرفض طلبك ات ونحن كيف نسعاهو
ابقوا قصادي وحدي القبيله معايد
عقبال من رجع فوق الخسائر عايد
وان كان دارني انا مابتراجع جموع الزايد
وان حصلني قط ماظن يعود بفايد

عبدالله:
مبقيف ود دكين واصل السرج ملعوق
وفي دربك بسوق واياك ياطه ملحوق
وات صنديد تصد الميه ما ممحوق
بنخاف كترتم ويد الرجال بتحوق

طه :
ليه خايفين علي الدنيا عيشا مخاطر
الواجب نسوي ونرجى ستر الساتر
في وداعة الكريم الليلة في نيتي خاطر
يادار ريا ما كان الفراق بالخاطر
كفاية مع السلامة انتهيت خلاص
غير الشورة دي مالينا تاني خلاص
في نيتي حريرالدكب القصاص
ما بخاف ود دكين ان جاني بالرصاص

قام مارق منهم وساق بت عمو ماشي بيها طبعا لارض الجعلين
ماشي للملك نمر يوريه على ان نسيبك دا جاي يقلع مني بت اعمي _ قام مارق _ بعدين احمد قال لعبد الله
احمد :
عم عبد الله خبرك هذا شيتن فاجع
كيف بنطاوعة من بيناتنا يطفش ناجع

عبد الله :
سمعتو كلامو من الفيها ما متراجع
وفي الشي الشايفو غط بي هينة ما بيعود راجع

احمد :
نركب نلحقو نخليهو يمشي براهو

عبد الله :
شورة القال اخير مانلحقو ونبراهو
العاقل بحسب للتجي مدافراهو
بنفكر على القدامو والبواراهو

احمد :
فوق السقوط قط في ظني مايخلوهو
كيف موقفنا ساعة يلحقو يكتلوهو

عبد الله :
ن وقع القدر مابتقدرو تصدوهو
ود وقتو الكلام اسع اخير خلوهو

وبعدين طه ساق بت عمه وفي الخلا كان بحجي فيها وقاليها :

طه :
درقي يكركب كمه
ركبي يشيل دي الهمه
اصلي بطرز لمه
مني تحود الامه
جملي يكسر الغرقه
سيفي يحل من كربه
قلبي سمين تربة
ياريا الحلم ماشفتي كيف اتهول
واتفسر براهو وبالشين علينا اتاول
داخل راسي فكرا منو ما بتحول
بكتلو ود دكين ان كان قرب وان طول

ريا :
اسود ود دكين باسمو ماتحجينا
هو الفرقنا قمنا من البلد هجينا
عقب في دار جعل تاني الخراب ما بجينا
مابسوي الرماد المك نمر بحجينا

يسكتو شويه قامت ريا قالت لي طه :
ريا :
ماك شايف الدرب
طه:
ماشيهو بي كرعيى ثلاث ايام وضحويه وكان معاي سعيه
كيف يلحقنا زول شندي ومعاه معيه
قبيلة دار جعل محمية فيها اسودا
تقدل بالكارم ديمه وحاقدا حسودا
راس المك نمر كل القبيلة اسودا
ركازة القبائل في السنين السودا
بكره نجيه وسيفا يجيك بولادو
العز والكرم من الكبار تيلادو
ما اطن ود دكين بشينه يوطا بلادو
ماخد بت اخوه شمه ام اولادو
انا ودعتك المك مابخاف المتلو
اهون من شراب المويه عندى اكتلو
وارجع للبطاحين تاني وراينا نفتلو
والشكريه تقيو غير حرب مابتلو
يا ريا البطاحين اصبحت محقوره
على البطاحين دايما سارحتم معقوره
مابتقال عز وتعيد مكان وقوره
الا تعربد الغاره وتقضي صقورة

ريا :
في داب الشديدة ابقالنا قوم دربنا
بوصفك دحين من شندي نحن قربنا
ما بنفتق عشان بالفتقه دي تفرقنا
مابنوم الرجال امكن يمسكوا دربنا

طه :
بسمع حركه
ريا:
شد ديل يبقى رعاويه
طه :
حركة صهب دا ركوب سروج مو رعويه
وقربن مننا وفي ظني ناسها شويه
وكان ناس فزع مابجيبوا حتى ضويه

ريا :
الشيء البين سعينا لتهويلو
وضايقنا الصعج ما اظنو يعود لعويلو
الناس المعاهو عرب صعيد ياريه
ما اولاد عم ديل والله ماشكريه
معروفين تمام في كل بلد وجريه
كان حفرولو بير ولقوه شجره ضريه
عارفين ود دكين مابهم بخيلو وجمالو
بكتلني وبسوقك وهم بسوقوا المال
وبكتلو ود دكين ود الطانها في فكري
بتشوفي الفضائح المابجيك من شكري
الشكرية فرسان ومستحقين شكري
دا الصح قلتو ليك انا لابخاف لا مكري

ريا :
ياطه استعد الناس عنونا عديل
طه :
وين شفتي القطاع بتسوي هم قديل
بضاير العوقة اخوك الما بهم من ديل
براك بتشوفي ياما اشبعهم من بهديل

هنا شيخ العرب جاء ووقف جمبهم وقال لي طه :
شيخ العرب ود دكين قال :
اتعبت الزمل حفيت وراك مستبقا
احسن ليك تفوت ريا وتحل الرفقا

طه :
كان كل القبايل جات علي منطبقا
افوت من ريا ياشيخ العرب مابتبقا
شيخ العرب :
البلقى القبايل مابسوي سواتك
خربت قبيلتك ياطه وين داواتك
تاني بعد جريك البشهدنو اخواتك
فاقد الثبات فارق درب ابواتك
ابواتك تيوبا كانوا باعون طايل
اياديهم للرقاب تحجا وتعدل المايل
سيف باعك كراعك مابتخاف قول قايل
افو ياود حسين فيك السوال مو خايل
ابقى لي نسيب احجاك وامن روعك
وقول الدايرو في المال اجيك في طوعك
من هذا الغرور ياولدي اولى رجوعك

طه :
ياشيخ العرب جربت لحسة كوعك
كل ما اوغرك في الشينة اراك تتقدم
اتعرميت خلاص انا صبري حصنة اتهدم
اصلو البينا مابتنفك من غير دم
الكاينة تكون بوراك مافي ندم
واحد جاي مع شيخ العرب عربي قال لي طه
العربي :
اصلو الخملا مابسمع نصيحة الهادي
اول خفنا من البهادي الهادي
ياطه البهدى الما بضرب الوادي
يمشو على الرجال يجري مقبل فاضي

طه:
هسع تشوفوا ان كان صح وان كان تهديد
هسع وصلت الميس دحين حديد يلاقي حديد
ينبرش الطرور ويثبت الصنديد
خليه المضا لاقي البجيك جديد
(واحد برضو مع شيخ العرب قال لطه)

عربي اخر:
نافز فيك قدر ياطه انت عميت
وفي المروق وقعت عترت ماسميت
من الجاي قضيت وبقيت خلاص زول ميت
في تركتك كفاي انا بركب اب سوميت
(ابسوميت دا جمل طه)

طه:
الداير الغنى يعمل حساب لي فقرو
وكعب الزله وكتين المتلي تكابرو
اب سوميت خلي الليلة سيدكم اعقرو
وين تاني الملاج وكت يتلب صبرو

شيخ العرب :
لم باقي الكلام ياطه بهمك سرب
جيتك استعد

طه :
مرحب حبابك اقرب
من قومت الجهل انا للقام مدرب
ياشيخ العرب الليلة نجمك غرب

(وهنا وقع القتال ها ها ها 000 طه ضرب شيخ العرب جدعو والتفت علي جماعتو قال ليهم )

طه :
ترا شيخ العرب قبض الربح من تجرو
واتوسد تقيله انشاء الله مابتصبروا
انتو الشورة كيف عند الزمل بتحجرو
صنقعوا للسماء بطيروا ولا بتجرو

احمد :
انزل ياعمر الروح في ايد الخالق
بجيها الدر في الدرقة ساسك غالب

عمر :
عاين دا الخشيم دايما تنط متشالق
ماتنزل عليه انت ماك بالق

طه :
ضربي علي وصف البوصف عايز
وفي قارب التلوب انا نايبي دايما غارز
اسمعو ياطرش كما بجيني واحد منكم مبارز
بضرب طرف مافارز
ترااب سوميت اركب ياعمر سافرت
قبيل وقت الكلام زي الاسد طفرت
مالو دمك متل التقول جفرت

عمر :
انا علي الحلف ان كان بقيتو سرية
انتهي منكم قبال تجي العصرية
جيتكم استعدو

هنا كلهم قالو لريا:
هادي السيوف واقعين وراك ياريا

طه :
ياخضرة المفرهد فوق جروفة نديه
علي الواقع وراك انا كيف تشيلو ايديه
حتى ان كان قتلني عافي ليه الديه
دمي ومالي هيلك واقبليه هديه

ريا :
رجال التابه انتوا الستره تب ما فالكم
اتامنتم قوموا سوقوا جمالكم
حتى جمل ود دكين سوقوه يتبع مالكم
نمشي في حالنا وانتو امشوا في حالكم

(الجماعة قاموا صوف جروا جري شديد ) : اتلفت طه على ود دكين وقال لريا :

طه :
زايلة رقد دكين اسد القبيلة الراعي
كما ضايقني هو ماكنت قطعتو ضراعي

ريا :
تتأسفلو ليه داير يجز ابو اولادي (الراعي)
والنعلات حرام ماتضوقا تاني كراعي
(يعني ان مات ود اعمها (طه) للقيامه مابتلبس نعال)

طه :
موت المتلو نقصان للعرب في الجملة
كان راس الجراري وهو البقود الحمله
اطراف عائل يقيف ليه بعد ما يمله
كما شويه كان داير يعمل العمله

(بعدين قاموا مشو في دربهم ماشي قاصدين الملك نمر ، وبعد ماوصلو دار الجعلين هو وبت اعمو لقوا المك نمر قاعد ومعاهو اعوانو وجماعتو الجعلين واولادو ودخل عليهم طه وقال ليهم :

طه :
التلب اللذوم مدخور يفيد العائله
اقدل تمهل فوقو الحمول الهائله
اياك ميز القبائل فيك تسند المايله
فراج كربة الهم اب قبائل جايله
عامر جمعكم انشاء الله ما انفضه
ما جابني مال مابدور دهب ولا فضه
بدور المك نمر سيد النحاس الجدضه
جيتو علي حملة غيرك ما بتنقضة

تقضي كان بقدره

طه :
انت اللزوم ماك حاشي
الف ذي حزمتي تشيلها تقدل ماشي
التقيان تغشه والضيف بتراشي
ما داب قبيلتك النحن بيك نفاشي
جيتك واملي فيك يامك تكشف همي
في الاول وداعتك وفي حماك بت عمي
وقتين تقبله ات شلت تلتين همي
والتلت الاخير تحجاني تحقن دمي
بت عمي اب كبس ابوها كما كان ابوها فقير
ابوي قبال مات ورباني كنت صغير
وقت لحقو عيش وراه ماني حقير
اصعد الغارة علي جاري ولعروضي اغير

المك :
مالك اسع شن جاك

طه :
جاتني جنية حربة ربي ما بخاطري ما بنيه

المك :
قتلت منو وجريت

طه :
اتلفت علي بت اعمو قال ليها :
ها مابتسمعي يابنية
هدي المابيها لكن خفت ورانيه

( ويسكت شويه ويلتفت للمك )

طه :
الموت مابخاف الخوف مو هولي
الشىء البخافو بخاف بهادل عولي
الناس الوراي كان براي يسعولي
في راس الكتلتو اقيف يمين للحولي
كان هم برضو بتارت ياخدو الهيلتي
ما كانت التجيت ضاقت علي مهيلتي
يامك ناس قله بخاف يخربو قبيلتي
بجعل احتميت فوقك سندت تقيلتي
الشكريه تقيو وللجوار مابراعو
حمد ود دكين في راسي خت كراعو
سمع بي سفري قاصد شندي قام بسراع
وقاطع دربي يخرت ريا قال بي ضراعو
جيتك من اهلي قاصدك مابقبل تار
انكشف الامر براك دحين اختار
اما تبقى بيني والبخافا ستار
ام تكتلني ات نسيبو تاخد التار
اياك عز القبائل والكرم فيك طبع
وجارك مابهم ان يسوي السبع
ان كان اجلي تم اخد قصاصو السبع
واللياكلو الاسد اخيرلو من الضبع

( المك نمر هنا التفت علي الجعلين القاعدين في المجلس جمبو قاليهم :

المك :
مطارق جعل انتو الكلام سامعنو
قولو دحين رايكم وفكركم الشارعنو

(واحد جعلي تلب وقف علي حيلو قال ليه :

جعلي :
كان ضيفنا مانحجية وندافع عنو
نرمي سيوفنا ليه تاني الحصان ساعينو
قديم يامك ديارنا مرتع الامال
وشعبة الكون ركازة الزمان ان مال
ساعين من جاري العوق يمين وشمال
بي يمين التنزيل نحجاه قبل المال
اديه الامان يقدل ويلقي مناه
البقى في امان المك منو البدنا
كل اسم جعل من اعلاه لي ادناه
محال يقرب والمك نمر ادناه

المك :
انت كبارنا شورتكم ما معنى بتعمرو
مارستو الدهر ضايقين حناضلو وتمرو
قايت الحي فناه الموت نهايه امرو
لكن بي وراه ذكرو يصبح عمرو
اياها الضامره وعليها كنت مصمم
ما اتعداه رايكم جاي وليها متمم
سير في اماني طه الزمام متزمزم
ادوه هدومي وبعمامتي اليكون متعمم
ارتع في اماني انا الاغبش البطقو
الزمني غرور و للرقاب ما اعتق
بالمال اشتريت عازم اباصر رتقو
وان قال لا عقب نوسع فتقو
تقول بالامان فوق النحاس بشربو
لامن يسمعو الناس البعاد والقربو
عقب البدنو طه يمين عقابو نخربو
انا المك نمر كبريت يحرق الجربو

(طه طبعا اتكيف من كلام المك نمر خلاص قال :
نمرا يركب الكيك البطل اتحرن
نمرا يقلب العوقة اب صفوفن جرن
خلوات صدرة في علوم الحروب كم قرن
سيفو بنسف الدرع الحديد مقرن
مو متل الشجر حاضن فرعو مقيل
دا النمر البضاير الصف محل ما يميل
كل ما اقول شكر القاه فيه قليل
كفو بيخجل العين اب سحابة ميل
غابة المك قبيلة ما تخطى اصولا
العشمان يعيش فوق ضلها ومحصولا
بالشين البدوره بعيد عليه وصولا
فروعه سيوفه ومطارق جعل في اصولا
يلتفت الدهر وكتين تدقو نحاسا
والكون يطرب والدنيا تزأر حاسا
والافلاك تقيف بي صعدها ونحاسا
ترجا اشارتهم كان تليه ولا نحاسا
عرمان جدكم النسبه عباسيه
وايان فضلكم لليله ما منسيه
ها هي الدنيا حيه بفخر كم مكسيه
نزيلكم مابهم ان سوى الف سيئه
من سابقة العرب في اصلها وفخوده
مثبوت الرجاله وعندكم ماخوزه
صغيركم يدخل الحاره ميوس يخوده
مجرب من قديم سيفكم بوابر الخوده

واحد حاجب كان قاعد جم نمر قال

الحجاب :
نبه بالامان فرسان الرجال اتعزرت
عروس الكجرة فرحانة وطرب اهتزت
عرمان عز لله قبيلتو بيك اعتزت

الملك :
وصلو طه للبيت المخصص ليه
واحفظ كل موجودو وجميع ما ليه
خدمتك ياحسن تقعد معا تسليه
في كل يوم تعين ناس يغفرو عليه

طه :
عاشمكم مأكده مابيرجع خايب
صغيركم رايو عند الغير يوازن الشايب
وشايبكم مدرب رايو دايما صايب
فارسكم جسورا مابدقدق هايب
تاني ايام قهر عينيا جافي منامي

ياخي والله جد انت مبدع يابو الزوز.. والله دي اجمل حاجة عجبتني في المنتدي..

تسلم اخوي ود شاهين اديك العافية

» البشير من رئيس دولة إلى زعيم أمة!!
» هيكل انساب قبيلة الجميعاب ام قبائل الجعلين
» نبذة عن قبيلة الجميعاب وهي احدى قبائل الجعلين المعروفة