خليل فرح اغانى وطنية وعاطفية

]b]عازة في هواك[/b]

خليل فرح

عازة في هواك عازة نحن الجبال
وللبخوض صفاك عازة نحن النبال

عازة ما بنوم الليل محــــال
وبحسب النجوم فوق الرحال

خلقة الزاد كمل وأنا حالي حال
متين أعود أشوف ظبياتنا الكحال

عازة ما سليت وطن الجمــال
ولا أبتغيت بديل غير الكمــال

وقلبي لي سواك ما شفتو مال
خذيني باليمين وانا راقد شمال

عازة ما نسيت جنــة بلال
وملعب الشباب تحت الظلال

ونحن كالزهور فوق التلال
نتشابي للنجوم وانا ضافر الهلال

عازة جسمي صار زي الخلال
وحظي في الركاب صابه الكلال

وقلبي لسه ما عرف الملال
أظنه ود قبيل وكريم الخلال

عازة ما أشتهيت نوم الحجال
ولا السوار بكي في يمينا جال

وعازة في الفريق لي ضيق مجال
قبيلة بت قبيل ملأ الكون رجال

عازة شفت كيف نهض العيال
جددوا القديم تركوا الخيال

روحك أم سماح سري كالسيال
شجوا الفؤاد حيوا محسور الليال

عازة في الفؤاد سحرك حلال
ونار هواك شفا وتيهك دلال

ودمعي في هواك حلو كالزلال
تزيدى كل يوم عظمة ازداد جلال

عازة في حذا الخرطوم قبال
وعازة من جنان شمبات حبال

وعازة لي ربوع ام در جبال
وعازة في الفؤاد دوا يشفي الوبال[center]

الشرف الباذخ

نحن ونحن الشرف الباذخ
دابي الكر شباب النيل
قوم وموم كفاك يا نايم
شوف شوف حداك يا لايم
مجدك ولي وشرفك ضل
إمتي تزيد زيادة النيل

نحن نطارد العنزة الفاردة
نحن نزود مشارع النيل
نحن برانا نحمي حمانا
نحن نموت ويحيا النيل

ما بنندس ما بنتوصي
نحن نكيل برانا نشيل
نحن الطينة ومطر العينة
نحن الوادي برقه يشيل
نحن الصولة سيوف الدولة
نحن كنانة اسماعيل

بابه العالي وشرفه الغالي
كان لجدودنا ظله ظليل
يا حكامنا جيبوا البينه
ولا انقرعوا كفوا الشينه
ده ود عمي وده ضريب دمي
انت شنو طفيلي دخيل

يا نزلانا أمرقوا الذمة
كيف ينطاق هوان الأمة
شالوا حقوقنا وزردوا حلقونا
ديل عاوزين دمانا تسيل

من تبينا قمنا ربينا
ما اتفاسلنا قط في قليل
ما فيش تاني مصري سوداني
نحن الكل ولاد النيل

فلق الصباح
خليل فرح


فلق الصباح قول لى أهو نورك لاح خلى
يا خفيف الروح هو هذا نــــداك
ام ندى الازهار

من جنان رضوان أصلك لذا كل ربيع فصلك
إتنفس فــــــوح تتنفــــس ناس
و رياض و بحار

ما ألذ نسيم وصلك ما رأيت يا جميل مثلك
يا بليل الســـوح هو هذا هــــــواك
ام هوى الاسحار

إنت روضه و ليك زهره وللا كوكب و ليك بهره
ضمخوك للجــــبير زعفران و عــــــبير
إنت نار فى بهار

صبغ الخدين حمره بعد ساعه بشوف صفره
الاصفرار ده كتير أخجلوك يا أمــــير
وللا نمت نهار

صبح البستان شايل شجر الرمان مايل
السلاف فى الدنان والكنار فى حنان
و الََهَزَار فى هِِزار

إنت كالطاووس خائل كبرياءك و فيك خايل
انزل إنت كمان غنِّ قول يا زمان
وين حبيبى آذار

ما عرفنا عدوك ذاهل وللا لسه غلام جاهل
متهلك صيف شنا عندك كيففى اللعب بالنار

فى لهيبك أشوف ساحل كالفراشه أجيك راحل
أنا خايف كيف يا لطيف الطيف
أهوى و أبقى فى نار

فلق الصباح نور لى نحور الغيد صور
جمعن فى الدور من خدود و بدور
َصَََدََفه و ُمحََّّـــار

عزه شوفى الحوش نور بى نجوم الليل غوَّر
با صباح النور على العيون الحور
و الخديد الحار

عزه قومى كفاك نومك و كفانا دلال يومك
إنت يا الكبرتوك البنات فاتوك فى القطار الطار

عزه شوفى شباب قومك سبقوك على كومك
بت رجـال ولــــدوك للقبيله هــدوك
إنت عز و بطــار

الجمال فى كمال وصفك أدبك و جمال خِلفِك
الضمير كالعــــــود و العيون السود
فى البطانه كتار

منزلك عُنوان ُظرِفــك نوريه يصون إلفك
زعلك يا أم خـــدود سوِّى ليه حـــدود
و منه يا ستار

في الضواحى

الخليل


في الضواحى وطرف المداين
يلا ننظر شفق الصباح
قوموا خلو الضيق في الجناين
شوفوا عز الصيد في العساين
يلا نقنص نطرد نعاين .
النهار إن حر الكماين .
كلبي يا جمجوم أصله خاين .
شوفوا كيفن يبرأ الملاين
هب شال وكشح المراح

*****

للقنيص الخيل خف راسن
نحن ما بنخاف من مراسن
المكارم غرقنا ساسن
والمجاهل مين غيرنا ساسن
ان عطشنا نمز مر وآسن
وأن عشقنا بنعشق محاسن
فى المحاسن كفي يومنا راح

*****

في الخميلة انجلت المحاسن
عيني حايرة ومشي قلبي جاسن
بعض حسنك هي يا محاسن
الحرير حين قدميك داسن
والزهور حين شفتيك باسن
والغصون من لدنك مياسن
والنسيم فاح بكر الملاح

*******

يا الطبيعه الواديك ساكن
ما في مثلك قط في الأماكن ..
يا جمال النال في ثراكن .
.ياحلاة البرعن أراكن ..
في قفاهن تور قرنه ماكن .
لا غشن لا شافن مساكن .
في الخزام والشيخ والبراح

********

شوف صباح الوادي وجماله .
وشوف خضاره وصيده ورماله .
.شوف يمينه وعاين شماله
شوف نسيم الليل صاحي ماله
شوف فريع الشاو مين أماله
..القمر خجلان من كماله .
.والصباح لاح بهل الوشاح

******

يا أم لسانا لسع معجن
كلمة كلمة وحروفو ضجن .
ديل خدودك غير داعي وجن .
ديل عيونك من غير سبه لجن
ديل دموعك من نظرة شجن
ده دلال ايه ده دلال معجن
محن الامات يا رداح

*****

ماك نسيم الليل بي برودك
نامت الازهار فوق خدودك
غرد العصفور فوق عودك
النفوس ما اتعدت حدودك
ما عرفنا عدوك من ودودك
بس أنا المقسوم لي صدودك
يا حياتي وأملي اللي راح

تعريف مختصر للشاعر خليل فرح


، ، ولد خليل فرح في قرية دبروسة بوادي حلفا عام 1892م حسب شهادة ميلاد بتوقيع من الشيخ كاشف حسن بدري ولو أن إختلف ذلك في سجل خدمته ، والديه من قرية صيصاب في أقصى شمال جزيرة صاي وتحديداً حلة ( هيباب) تقع بين حلتي برين وساب، فوالده هو الشيخ فرح بدري ووالدته زهرة الشيخ محمد أما إخوان خليل فرح فهم بدري وعثمان وعلي وحسن بالإضافة إلى شقيقته فاطمة، كان خليل فرح يتنقل في صغره بين حلفا والسكوت ودنقلا مرافقاً والده الذي كان يعمل بالتجارة وتوفي والده في أواسط 1915م بينما توفيت والدته في 1926م. تلقى خليل فرح دروسه في خلوة الشيخ أحمد هاشم والمشهور ب( بابا شيخ أحمد) في حلة (سوكرى) وواصل تعليمه في دنقلا وبعد نيله شهادة الهندسة في قسم الميكانيكا من كلية غردون عمل في البوستة وكان كثير الغياب وفسر ذلك بالعصيان وعدم رضاه بلتقي الأوامر من رؤسائه. في عام 1923م تزوج من السيدة سلامة أغا إبراهيم و شهرتها عند أهل صاي ب ( سلامة شلالية) وهي أرملة شقيقه بدري فرح ولد منها إبنه فرح وإبنته عائشة خليل فرح رحمهم الله جميعاً، الخليل بالرغم من أنه من بيئة نوبية بثقافتها ولغتها النوبية ومع ذلك أصبح رائداً للغناء الوطني وبشعره العربي الفصيح أربك رواد عصره من شعراء العاصمة وإلتفت الجماهير من حوله وزادت من شدة المقاومة ضد المستعمر وأربكت أجهزة المخابرات البريطانية التي وضعته تحت المراقبة والمطاردة خاصة بعد إنضمامه لجمعية الإتحاد السوداني بعد ثورة 1924م وجمعية اللواء الأبيض، توفي في 30 يونيو1932م عن عمر لم يتجاوز الاربعين عام وكان ذلك في مستشفى النهر بالخرطوم وكان بعد أن صار نحيفاً من مرضه وهو مرض السل الرئوى وذكر علته بقوله ( عزه جسمي صار زي الخلال) كانت كلماته أقوى من السلاح ومنها أغنية (عزه في هواك) التي تبدأ بموسيقى مارشال عسكري و( فلق الصباح) و(الشرف الباذخ) التي هزت أركان المستعمر.

السلام عليكم
الله الله الله علي هذا الكلام الجميل وهذه الروح الوطنيه العاليه
الأ رحم الله الشاعر خليل فرح بقدر ماقدم لوطنه وأهله
وجزاك الله خيراً ياباشمهندس علي هذا الكلام الجميل

تشكر اخى الطيب على هذا المرور الرائع

لك الشكر دائماً و أبدا يا باشمهندس برضو على المرور و لك الشكر على الدعاء لنا بالعودة غانمين سالمين لوطن عزيز تغنى و غنى له الشعراء٠

ماهو عارف قدمو المفارق
اغنيه يرثى فيها شاعرنا خليل فرح حاله وهو طريح فراش المرض


ماهو عارف قدمه المفارق
يا محط آمالي السلام
*******
في سموم الصيف لاح له بارق
لم يزل يرتاد المشارق
كان مع الأحباب نجمه شارق
ماله والأفلاك في الظلام
*******
يا دهر أهوالك تسارق
منها كم كم شابت مفارق
ما علينا الفات كله فارق
رقنا وله نعيد الملام
*******
من حطامك أنا غصني وارق
في شن أبقيت للطوارق
غير قليبا في همومه غارق
ولسانا برده الكلام
*******
ويح قلبي الما انفك خافق
فارق ام درمان باكي شافق
يا أم قبايل ما فيك منافق
سقي أرضك صوب الغمام
*******
يا بلادي كم فيك حاذق
غير الهك ما أم رازق
من شعاره دخول المأزق
يتفاني وشرفك تمام
*******
مسرح الغزلان في الحدايق
والشوارع الغر والمضايق
قول لي كيف أمسيت دمت رايق
دام بهاك مشمول بالنظان
*******
مجلس اللذات في النمارق
والترف لا زال وصفه خارق
ضاري حسك فاح جانا مارق
وله قاطعو الريح ما هو لام
*******
في يمين النيل حيث سابق
كنا فوق أعراف السوابق
الضريح الفاح طيبه عابق
السلام يا المهدي الامام
*******
أين مني الودعته شاهق
باكي ناهد لسه مراهق
عيني ما بتشوف الا شاهق
أين وجه البدر التمام
*******
أين مني الفي زهوه باسق
في شبابه نقي من مفاسق
بين ثيابه البيض المناسق
حولك اشبه رتل الحمام
*******
يا بريد الجو فوقي حالق
ميل علي الروح ليها خالق
عدت سالم قول وأنت عالق
مقرن النيلين كيلو كام
*******
الحبايب لفتوا الخلايق
بيني وبينهم قطعوا العلايق
ان دلال ان تيه كله لا يق
نحن ما مجينا الخصام
*******
يا جميل يا نور الشقايق
أملأ كأسك واصبر دقايق
مجلسك مفهوم شوفه رايق
عقده ناقص زول ولا تام
*******
من فتيح للخور للمغالق
من علايل ابروف للمزالق
قدله يا مولاي خافي حالق
بالطريق الشاقه الترام
*******
ما يئسنا الخير عوده سايق
الحي يعود ان أتي دونه عايق
الي يوم اللقا وانت رايق
السلام يا وطني السلام

البقعة



أذكر بقعة أم درمان

وأنشر في ربوعها أمان

ذكر يا شبابي زمان


دارنا ودار أبونا زمان

فيها رفات جدودنا كمان

ما بنساك خلقه ضمان

جنة وحور حماك أمان

ذكر يا شبابي زمان


بطرا الأسسوك زمان

كانوا يحلحلوا الغرمان

يساهروا يتفقدوا الصرمان

ذكر يا شبابي زمان


في السودان فتيح معروف

ولسه أب عنجه خوره سروف

ود نوباوي زول معروف

باقى وديك مشارع أبروف

ذكر يا شبابي زمان


كانوا جبال تقال ومكان

نزلوا اتربعوا الأركان

خلوا البقعة كل مكان

آهلة وزارة بالسكان

ذكر يا شبابي زمان


ليه يا كعبة العربان

غاضبة وفين عريسك بان

قبال نسأل الركبان

حبك من حسودك بان

ذكر يا شبابي زمان

جناين الشاطئ

شعر خليل فرح
غناء العطبراوى



فوق جناين الشاطي وبيـن قصور الروم

حَـيِّ زهـرة روما و ابـكـي يا مغروم

دُرّة سـالبة عقولنا لَبَّـسـوها طـقوم

ملكة باسطة قلوبنا تـبين عليها تحوم

الطـريق ان مـرّت بالـخـلوق مزحوم

كـالـهـلال الهلَّ النـاس عليها تهوم

شوف عناقيد ديسا تقول عنب في كروم

و الـوريد المـاثل زي زجـاجـة روم

الـقـوام الـلادن والحـشا المـبروم

و الصـدير الطامح زي خـليج الـروم



خـلي جات مرنوعة الصـافـية كالدينار

في القـوام مربوعة و شوفا عالية منار

موضة وآخر موضة هـيفـا غير زنّار

روضة داخل روضة غـنـي فوقا كنار

الجـبـيـن الهـلَّ ضـوّا فـيه فـنار

مِنُّـو هَلَّ الشارع مِـنُّـو بَـقَّ ونار

طـالعـة ما بتتقابل زي لـهيـب النار

تحـرق البِـتْـهابَل وللـبـعيد في نار

العزيز الباشمهندس وليد ابو البراء ، لقد أعدتنا للزمن الجميل الزمن الراقي بهذه الأشعار الوطنية الرائعة ، بعد أن كادت عيوننا و أسماعنا أن تصاب بالعمى و الصمم ، من قراءة زهير عباس و طه سليمان و محمود عبد العزيز و أمثالهم من اصحاب شعراء القنبلة و راجل المرة ، الله إن شاء ربنا يفقع مرارتهم ٠٠

مشكووووور جدا يا استاذ
لكن اظنك سمعت الجماعة اصحاب طبنجة وراء والقاش قدام . الملو البلد من ساقط القول وفاحش الافعال

الباشمهندس وليد تحياتي و كل عام و أنتم بالف الف خير و خير ، عليكم أن تملؤا هذا المنتدى الراقي بالمفيد و الراقي ، ونتمنى أن يزول ساقط القول و فاحش الأفعال و أن يجنبنا اصحاب الطبنجة وراء القاش قدام ٠٠ و ذلك عن بلدنا خاصة و عن عامة سائر بلاد المسلمين ٠

لك التحيه الاستاذ ابوياسر
واهديك اغنيه خفيفه لخليل فرح نظمهاا فى مناسبة زواج احد اصدقائه (على الهواء مباشرةً)

تم دوره ودور
لخليل فرح

تم دور وادور
عم نوره شال
فات الحله نور
زي بدر التمام
***
واحدين قالوا نور
واحدين قالوا دوب
مروي ما بتنور
زي بدر التمام
***
مين يقوم يتهور
يبري القيف هناك
تحته الدابي كور
زي بدر التمام
***
قالوا الكون اتطور
لا عاشق عفيف
لا جميل إتصور
زي بدر التمام
***
الحسود يتضور
ناره ماكله لسانه
كله زور ومزور
زي بدر التمام
***
الطريق الحور
دمي ما بروح
سيدة ليش يتجور
زي بدر التمام
**
هز شوقي وتور
يا نديم إزاي
جرحي المخفي غور
زي بدر التمام
***
يا قليب إتجبر
قوم وريني كيف
الكرام تتصبر
زي بدر التمام
***
نحن ما بنتعبر
النفوس أن حبت
تستحى وتتكبر
زي بدر التمام
***
ما خبير أتخبر
في الزمان الفات
والجديد إدبر
زي بدر التمام
***
أوعي لا تتشبر
هل رأيت لك عاشق
بالغرام يتنبر
زي بدر التمام
***
نحن ما بنطفر
ما بنهاب سفيه
إلا ما بنتزفر
زي بدر التمام
**
قولوا لي البتنفر
ما شالن قناع
المعاك تتوفر
زي بدر التمام
**
يا زميل إتشطر
شن بتشوف حداك
إلا حور مبطر
زي بدر التمام
**
يبقي يومنا مطر
ماله الكون دهين
والفريق معطر
زي بدر التمام
***
النحر مغمر
والسباته حارة
والمجال مضمر
زي بدر التمام
**
الشعر مخمر
يرشح كله ند
عردب المجمر
زي بدر التمام
**
قام محمد بشر
هز فوق تيجانن
سل سيفه وكشر
زي بدر التمام
***
قول معاي وإتفشر
نحن سياج عروضن
نحن يوم المحشر
زي بدر التمام
***
يا حسن اتذكر
طيب ليلتنا ديك
والصباح السكر
زي بدر التمام
***
المدام ما اتنكر
لا من ديكنا صاح
فوق رؤوسنا اتحكر
زي بدر التمام
**
كل شىء مفسر
ما في شىء غريب
والعسير ميسر
زي بدر التمام
**
ما في عين تتحسر
دام عريسنا دام
والحسود إتحسر
زي بدر التمام